Captura de pantalla 2017-12-19 a las 20.48.38

Especies da Ría de Pontevedra: Pinto e Maragota

In Novas by Amaya0 Comments

O Pinto e a Maragota, é unha das especies máis curiosas e estudadas e un dos obxectivos da frota artesanal que podemos atopar en lonxas como a de Bueu ou Portonovo. E é que aínda que o Pinto e a Maragota considéranse dúas mofotipos (distinta aparencia física) da mesma especie, Labrus bergylta, a día de hoxe a comunidade científica non o ten completamente claro.
Á marxe da controversia científica, Labrus bergylta é unha especie de ampla distribución que podemos atopar desde Noruega a Marrocos, penetrándose no Mediterráneo, que vive ligada ao fondo e a arrecifes rochosos (especie bentónica) a profundidades de 0 a 60 m aproximadamente. Aliméntanse de mexillóns, cangrexos e outros animais, rompendo cos seus fortes dentes as partes duras. Tras a actividade diúrna, á noitiña, busca protección en covas, podendo darse o caso de que sempre elixan o mesmo lugar de descanso, xa que se trata dunha especie territorial.

Trátase dunha especie lonxeva, pois excede os 25 anos de idade, 50 cm de lonxitude, escamas duras e un 3 kg de peso, sendo o lábrido máis grande presente no Atlántico Ibérico. Preséntase en dous patróns de coloración ben diferentes entre si, o moteado (pinto) e o liso ( maragota), sen que haxa detrás ningunha relación co tamaño, sexo ou estado reprodutivo. É hermafrodita proterogínico, é dicir, cando nacen todos son femias, e maduran ao redor dos 2 anos de idade (uns 20 cm), pasan uns anos como femia madura, ata que ao redor dos 11 anos convértense en machos. O momento exacto de cambio de sexo vai depender de factores ambientais polo que presenta gran variabilidade, podendo ocorrer como pronto aos 5 anos ou como moi tarde aos 15 anos.
Crese que forman grupos sociais na época de reprodución, na que cada macho adxudícase unha zona cunha ou varias rocas ben visibles, ás que atrae a certas femias para que depositen os ovos, que logo se encargará de coidar ata que unha semana máis tarde eclosionen.
En canto á súa forma de captura, o pinto e a maragota son capturados pola frota artesanal utilizando o trasmallo (arte de enmalle).

Deixe o seu comentario